Un observatorio de aves, visitas guiadas, obradoiros de cestería ou paddle surf son algunhas das propostas de ocio das que desfrutarán os participantes ata o próximo luns
A directora xeral de Xuventude, Participación e Voluntariado, Cristina Pichel, visitou hoxe Campamento de aventuras, a iniciativa que se está levando a cabo no Albergue Municipal de Cabana de Bergantiños, que mestura desde os xogos tradicionais ata os deportes máis actuais.
Trátase dunha das novidades que se incorporan este ano á campaña da Xunta de Galicia O verán que mereces, á que tamén se engadiron os de Bande, Parada de Sil e Silleda. En total, son máis de 7.830 as prazas que se ofrecen en 2021 para participar nos campamentos, minicampamentos e campos de voluntariado, mil máis que o ano pasado.
Neste campamento a rapazada, de entre 9 e 12 anos, está a desfrutar de observatorios de aves, visitas guiadas e roteiros, paddel surf, kaiak, xogos tradicionais e obradoiros de cestería, entre outras iniciativas. Os participantes poderán desfrutar desta iniciativa, que comezou o pasado sábado, ata o vindeiro luns 26 de xullo.
Cristina Pichel destacou a importancia que teñen estes programas de ocio, cos que se pretende fomentar o lecer educativo saudable e seguro das mozas e mozos galegos. Ademais de manter as medidas de seguridade que se aplicaron o ano pasado, o Goberno galego vén de introducir este ano a realización de probas de antíxenos gratuítas para todos os participantes e monitores antes do inicio de cada unha das quendas.
